جولة معنّى

موضوع: جولة معنّى الخميس 23 يوليو 2009, 7:40 pm

محاوره بيني وبين الشاعر الكبير جعفر حيدر من سوريا

علي عامر
من بعد ما بالشعر طببت الحروق = بيضلّ شاعل دم حرفي بالعروق
بجولات إلهامي أنا شمس الشروق = وأهل الشعر بغروبهن ظهرو الفروق
واسمي علي وأعلى من خيام الصبير = والكل تحتي بثقل رعدن والبروق

جعفر حيدر
ضلك رقيق وحاج تفتح مشكلة = روح التحدّي فيك مش مستاهله
بردك إذا بدي .. وبرجع بعتقك = وبعلمك تكتب قصيدك يا علي

علي
لا تفتكر انّك ي جعفر برمكي = وتتجاهل شروطي بساح المعركه
لكن مازالك ما بتقدر بالحكي = ولا بالفعل ع الإلتزام بمملكه
وحتّى تعلّمني على نظم القصيد = هاتلك شي ردّ تكون روحو محنّكه

جعفر
بلا مفخرة .. ردودي أنا يا عامري = مش برمكيه .. حيدريه بخاطري
ومش جايي حتى أرفعك عالمشتري = جايي اتعلم منك النظم الطري
لما لمحت الحكي صاير مهتري = والفعل بعضو بهرجة.. وبعضو فري
فضلت أسكت تا يصحيني كلام = يستاهل الردة .. تبيع واشتري

علي
مازال يا حيدر الك شمخة جبين = وفيك التواضع بالشعر كنز الثمين
لا تمتحنّي وتنصعق حيثي فطين = ولو كنت م بتستوعب السّر الدفين
لا تروّج حكايات تهجي الخالدين = وتزعج بضعف الصمت حكي الملهمين
احسن م سبع الشعر يا هـ البربري = يبلعك من بعد تقطيعك بـ حين

جعفر
صامت أنا والصمت قوة خارقة = وحروف صمتي للقصيدة خارقة
وأبيات شعري للثرثرة حارقة = ومن جن عبقر سرّ سرّو سارقة
حاسب على حروفك الحدي مارقة = لتكون عن قانون شعري مارقة
أحسن معلق مشنقة صمتي معك = وما يضل منك يا علي ولا بارقة

علي
الصمت ان وصفتو قوّة جنون الهوا = ولو كان للإحراج في بقلبك غوى
مش ثرثره حكي النبوغ ، ومستوى = شعري حلم مجنون وبفجري الدوا
وقانونك عبادة صنم مرّ وهوى = لمّا النبي حطّم صمت كفرك حوى
وحتّى ان شنقت الشعر يا جعفر بليد = التاريخ رح يحكي بنضالي والقوى

جعفر
يا صمت ضلك وحي بعيون الكلام = حتى نبوغ الشعر يضربلي سلام
بدنا شمس تفتح فجر فوق الأنام = بدنا فجر يطلع من كوام الركام
يا جنون حاجتنا دوا وكفر وملام = جايي بشعري روقك حتى تنام
شعري الصنم يللي ما واحد حطمو = حتى الرسول الأعظم ببيت الحرام

علي
الالهام يا جعفر حكي وظروف ناس = مش بس نسمه ت الندي يحرّر يباس
والشمس نار الهمس باعتلا جراس = وحتّى الفجر يطلع ، طرد قلبي النعاس
شعري انتفض بعد المصيبه وعا أساس = جايي بصمتك انت خالي من الحواس
لكن عندما تشوف للعذرا الصنم = رح يجبرك تحكي شعر لمعات ماس

جعفر
عا موسم الأشعار متل الشمس سيح = وخلي مجالك كل هالكون الفسيح
وكلما علينا عصفت من الوهم ريح = خلي الحلا ينقط زجلنا والفصيح
ويا شاعر الجايي معي عالمستريح = مرّن زنودك هون مش رح تستريح
تركني أنا تمثال للعدرا ... ومعي = لفيفة وفيها روح وهموم المسيح

علي
لا تكفر ن كان النبع عندك شحيح = و ع الصّمت شلاّلي حكي والعطر ريح
وهمك مجالو غر شكل تا تستريح = رح فيّقك بين الهجا وبين المديح
مش بالزنود الشعر يا عامل فصيح = بالفكر لكن انت بالفطره كسيح
ولو ما حكي الإيمان بقلوب الورى = م تمرّد على الصمت فادينا المسيح

موضوع: رد: جولة معنّى الجمعة 24 يوليو 2009, 12:17 am

الاخ الشاعر الشاطر علي (الصايع) عامر
جوله موفقه وعلى مستوى
حيث جمعت ردّاتك سلاسه الكلمات والاجوبه الممتازه
تحيّاتي لك والى الامام ,
وحضّر حالك يمكن اهجم عليك بردة معنّى

موضوع: رد: جولة معنّى الجمعة 24 يوليو 2009, 12:20 pm

ولا يهمّك عمّي ابو محمّد

اهجم بافتتاحيّه كمان

وبشرّفني اكتب قبالك

شكرا لحضورك الراقي الجميل

محبّتي وتقديري

موضوع: رد: جولة معنّى الجمعة 24 يوليو 2009, 3:17 pm

ياعلي جبهة شعر قدها وقدودها
قوافي ل معنى منك مورودها
وشاعرنا جعفر لحن الكلمه وانشودها
والعم وائل عاشقها ومعبودها
من حروف شعرو فتحوا ورودها
والشاعر اللي يعرف الكلمه ومقصودها
غير اللي يزيد عقده ع حبل عقودها
والانسان اللي حامي لاوطانو حدودها
بيرفع راسو بين الناس بوجودها
وانت يا علي الاشعار جودها
جبهات الشعر ما الها حدودها
ونحنا نمور ل معنى واسودها
في فرق بين كبارها وبين مولودها
وان شا الله يا علي فيك بيرتقي الزجل
لحتى منابر زجلنا تحافظ عصمودها

موضوع: رد: جولة معنّى السبت 25 يوليو 2009, 7:29 pm

هلا بيك اخي يحيى

اسعدني حضورك الرائع

شكرا لهذه الابيات الجميله

محبّتي وتقديري

موضوع: رد: جولة معنّى الخميس 06 أغسطس 2009, 6:38 pm

رائع يا علي
مباراه قويه وجميله
الله يعطيك العافيه
والى الامام دائما

tulips

_________________

موضوع: رد: جولة معنّى الإثنين 17 أغسطس 2009, 1:02 am

شكرا جزيلا اخي مفيد

الجميل هو مرورك

شكرا جزيلا شاعرنا الكريم

الاستاذ لطفي الياسيني

waraqistan